Nora at Jasmine, pinalakpakan sa ‘Dementia’ screening!

Written by  JUN ROBLES LANA

ABANTE

DIRECTOR'S CHAIR

Salamat sa Diyos at maayos na naidaos ang premiere night screening ng Dementia noong September 21 sa Trinoma mall cinema 7. Na-stress ako ng bongga bilang producer. Parang gusto ko na lang magdirek sa susunod. Ha! Ha! Ha!

8:30 PM na nang magsimula ang screening pero alas-siyete pa lang ng umaga nasa Trinoma mall na ang crew para ipasok ang mga gamit at magtayo ng stage. Naisip kong mamigay ng loot bags na may lamang snacks sa ilang kaibigang manonood ng pelikula.

Eh kasi, ‘di ba mas masayang manood ng sine ‘pag may kinukutkot ka? Kaya nu’ng umaga, namili pa ako ng popcorn, kropek, pastillas at mineral water. Haggard pala. Talo ko pa mamimigay ng relief goods sa dami ng kropek na pinagbibibili ko.

SRO ang screening, at laking pasasalamat namin sa Trinoma mall na pumayag magpapasok ng mga tao sa sinehan kahit wala nang upuan. Ang daming Noranians na lumapit sa akin, nakikiusap na bentahan sila ng ticket.

Ipinaliwanag kong invitational lang ang screening, naintindihan naman nila, pero naawa pa rin ako, lalo sa mga taong galing probinsiya. ‘Yung isang Noranian, may regalo pang shades para kay Direk Perci.

Nagawa naman na­min­g ipasok ang lahat ng tao. Pero sa sobrang dami, sa hagdan na lang kami ng sinehan umupo. Dapat magkakasama kami sa isang hilera ng mga upuan nina Ate Guy, Jasmine Curtis-Smith, Bing Loyzaga, Chynna Ortaleza, Yul Servo, Althea Vega at Jeric Gonzales.

Kaso nagkagulo na sa seating arrangement. Pati ang mga bisitang sina Eugene Domingo, muntik nang mawalan ng upuan.

Hindi bale. Ilang beses na naman naming napanood ang Dementia. Mas gusto naming panoorin ang reaction ng audience.

Pero ang hirap pala ng may katabing direktor kahit asawa mo siya. Lagi akong sinisiko, paulit-ulit na tinatanong kung maganda ba ang pelikula.

Ganyan din ako dati sa kanya noong hindi pa siya nagdidirek. Ha! Ha! Ha! Pwes ngayon alam na niya ang pinagdadaanan ko.

Pagbubuhat ng bangko ‘pag sinabi kong maganda ang pelikula. Kaya uulitin ko na lang ang Grade A na nakuha nito Cinema Evaluation Board. At ang pagkakapili nito para mag-compete sa Fantasporto International Film Festival sa Portugal.

Isa ang Fantastorpo sa pinakamatanda at pinakamalaking horror/fantasy film festival sa Europe.

Pero siyempre, para sa isang horror film na tulad ng Dementia, wala nang mas titindi pang kara­ngalan ang sigawan at tilian ng tao sa premiere night screening nito. Ilang beses ding pinalakpakan si Ate Guy, lalo na ‘yung eksenang ilang minutong nakatutok lang ang came­ra sa mga mata niya.

Nanood sa screening ang ilang kaibigan kong taga-New York na kasalukuyang nagbabakasyon dito. Hindi sila masyadong pamilyar sa mga artista natin, pero bukod kay Ate Guy, hangang-hanga sila kay Jasmine Curtis-Smith, na ilang beses ding pinalakpakan ng audience. Ngayong Miyerkules, September 24, na ang showing ng Dementia.

----------

Image:  Erickson Dela Cruz