ni Alvin Dela Cruz Bernardino
Maikli lamang ang
sanaysay na ito sa kadahilanang napakarami nang naisulat tungkol sa buhay at
pagiging artista ni Nora Aunor… Mula sa pagtitinda niya ng tubig sa may riles
ng tren sa Iriga, ang pananagumpay niya sa Tawag ng Tanghalan, ang pagiging
isang tanyag na mang-aawit, radio talent at product endorser, ang pagpasok sa
makulay na mundo ng pelikula at telebisyon, pagsubok sa mapanghamong larangan
ng pagganap sa lehitimong entablado at ang pagyakap sa mas mataas na antas ng
sining pampelikula at artistikong pagpupunyagi sa mas malalim at mas
makabuluhan nitong kahulugan.
Sinasabing sumugal
si Nora upang maabot ang kinalalagyan niya ngayon sa kasaysayan ng pelikulang
Pilipino. Walang takot niyang tinahak ang daan na bihira lamang ang sumusubok
baybayin… Hindi siya nagpasilaw sa kinang ng komersyalismo na siyang mababaw na
basehan ng katanyagan ng mga bituin sa ngayon… Si Nora na isang risk-taker at
tunay na alagad ng sining ay naghanap ng isang bukal na makatitighaw sa kanyang
“artistic thirst” --- sa isang malaya, mapangahas at “experimental” na approach
sa pag-gawa ng pelikula… Buong tapang niyang niyakap ang “indie spirit” o
independent filmmaking at ang pag-gawa ng mga seryosong pelikula o art films
tulad ng “Tatlong Taong Walang Diyos” at “Bona” sa ilalim ng sarili niyang
produksyon.
Sa ngayon, patuloy
si Nora sa pamamayagpag sa indie world… Kasalukuyan pa ring umaarangkada ang
pelikula niyang “Thy Womb” sa iba’t ibang panig ng mundo na nakapagbigay na sa
kanya ng tatlong prestihiyosong parangal bilang Best Actress mula Italy,
Australia at Hongkong maliban pa sa mga nominasyon at citations mula sa iba’t
ibang international film festivals.
At sa darating na
1st Cine Filipino Independent Film Festival, muli na namang mapapanood si Nora
Aunor sa isang obra ni Mes De Guzman --- ang “Ang Kwento ni Mabuti”.
Naglaho man ang
matinding kasikatan o commercial appeal ng isang Nora Aunor, binigyan niya
naman tayo ng isang malaking dahilan upang ipagmalaki natin ang ating pagiging
Pilipino… Isa na siya ngayong alagad ng sining para sa mundo --- isang
pagkilala di lamang sa taglay niyang husay sa pag-ganap kundi maging sa
kahalagahan niya sa ating kultura. ANG PAGKILALANG ITO AY HIGIT PA SA ANUMANG
“COMMERCIAL SUCCESS” NA PANANDALIAN LAMANG.
Matalino si Nora
Aunor… At hindi siya nagkamali sa landas na kanyang tinahak…
No comments:
Post a Comment